تاند، پنجشنبه، ثور ۱۱مه: د بالیووډ نامتو ستوری رشي کپور د ممبۍ په یو روغتون کې د سرطان ناروغۍ له امله د ۶۷ کالو په عمر ومړ.
د هغه مشر ورور رندهیر کپور رسنیو ته د رشي د مړینې خبر تایید کړی او ویلي یې دي، نوموړی د چهارشنبې په ورځ روغتون ته رسول شوی چې د ساه لنډۍ تکلیف هم ورته پیدا شوی و او د سرطان ناروغي یې هم زیاته شوې وه: (( د چهارشنبې په سهار د رشي کپور وضعیت خراب شو بیا مو ایچ این ریلاینس روغتون ته ورساوه.))
دا په داسې حال کې ده چې رشي کپور د تېر کال په سپتمبر کې له امریکا څخه تر یو کلنې درملنې وروسته هند ته ور وګرځېد او روغ شوی و خو بیا وروسته د روان ۲۰۲۰ کال د فبرورۍ په میاشت کې د طبیعت د خرابېدو له امله دوه ځله روغتون ته رسول شوی و.
رشي کپور پر ۱۹۷۳ کال له بوبي فلم څخه خپل فلمي ژوند پیل کړ او لیلا مجنون یې د همغو وختونو تر ټولو مشهور فلم دی.
رشي کپور د مشهور ډایرکټر راج کپور دویم زوی او د رنبیر کپور پلار او د اداکارې نیتو سینګ سره یې واده کړی و.
تر ده یوه ورځ وړاندې د بالیووډ یو بل مشهور ستوري عرفان خان هم د سرطان ناروغۍ له امله د ممبۍ په یو روغتون کې ساه ورکړه.
د دواړو په مړینه د هند سینما په ماتم کې ډوبه شوې ده.