تاند- امریکايي څېړونکو یو نوی جین، چې د انسان د بدن له ساعت سره په ارتباط کې دی او د سینې د سرطاني تومور سبب کېږي، کشف کړی دی.
د بدن ساعت، چې د ژوند ساعت یا بیالوژیکي ساعت یې هم بولي د بوټو او ژوو په کیمیايي، فزیولوجیکي پروسې کې یو تقریباً ۲۴ ساعته سرکل دی.
د میډیکل ایکسپریس د راپور له مخې، له ډېرو کلونو راهیسې ډاکترانو د (BRCA1) او (BRCA2) جینونوخوځښت او حرکت د سینې د سرطان د خطر له زیاتېدو سره اړوند باله.
اوس د امریکا د ټکساس اې انډ ایم (Texas A&M) پوهنتون څېړونکو کشف کړه چې (Per2) پروتین د هرې حجرې د محیطي ساعت د منځ تنظیموونکی میکانیزم د سینې د تومور په وده کې مهم رول لري.
د سرطانونو په منځ کې د سینې سرطان ډېر عام دی او ویل کېږي چې که په وخت تشخیص شي، درملنه یې نسبتاً په اسانه کېدای شي.
د دې ډول سرطان تشخیص د نورو سرطانونو په پرتله په اسانه کېدای شي.