تاند- نیوزیلنډ په وروستیو کې د شیشو د یوه توپ په شان سپوږمکۍ فضا ته ولېږله چې د لمر رڼا مځکې ته منعکس کوي.
لب راکټ کمپنۍ د جنورۍ په ۲۱ مه دا توغندی له نیوزیلنډ څخه فضا ته ولېږه.
دې راکټ له ځان سره د ۳ تجارتي سپوږمکیو ترڅنګ یو شیشه يي توپ، چې (Humanity Star) نومېږي، هم له ځان سره د مځکې مدار ته یووړ.
د هیومینټي سټار یا شیشه يي توپ قُطر نژدې یو متر دی او د شیشو له ۶۵ پینلونو څخه جوړ شوی دی چې د لمر وړانګې منعکس کوي.
دا وړانګې به د مځکې ټول اوسېدونکي لیدلی شي.
دا له جنوبي نیم کُرې فضا ته لومړنۍ تجاري سپوږمکۍ ده چې سږ کال لېږل کېږي.
دا سپوږمکۍ به ۹ میاشتې په خپل موقعیت کې پاتې شي او بیا به یې د مدار ارتفاع کمه شي او د مځکې په اتومسفیر کې وسوځي.
تر دې وړاندې روسانو ویلي و چې په دې فکر کوي چې داسې سترې هیندارې د مځکې په فضا کې ځای پر ځای کړي چې ستر ښارونه د شپې په مخه روښانه کړي.