تاند ( دوشنبه، د اسد ۱۳) د افغانستان پخوانی ولسمشر حامد کرزی وایي، چې د اختر د اوربند پرمهال تروریستي بریدونه د سولې د دښمنانو کار دی.
د حامد کرزي له دفتره په خپره شوې مطبوعاتي اعلامیه د نوموړي له قوله لیکل شوي، چې د افغانستان دښمن غواړي، چې د پردیو ګټو او اهدافو لپاره په افغانستان کې د جنګ اور بل وساتي.
سرچینې په جلال اباد ښار کې د ننګرهار پر عمومي زندان وروستی تروریستي برید غندلی او ویلي یې دي، چې د افغانستان خلک باید د دغو تروریستي ډلو مغرضانه اعمالو ته په کلکه پام وکړي.
هغه دغه راز زیاته کړه، چې هېوادوال باید په يووالي سره د دې ډلو پر وړاندې ودرېږي او په هېواد کې د بین الافغاني مذاکراتو له لارې د سولې په تأمینولو سره له افغانستان څخه د پردیو مداخلاتو لمن ټوله کړي.
دا حامد کرزي دا بیان له دې نظره د پام وړ دی چې نوموړی عموماً د دولت د وسله والو مخالفانو د بریدونو په اړه څه نه وايي.
د ننګرهار پر عمومي زندان تېر ماښام شاوخوا شپږ نیمې بجې وسله وال برید وشو، چې لا هم دوام لري.
د دې ولایت د والي ویاند عطااالله خوږیاڼی وایي، په دې برید کې تر دې دمه ۲۳ تنه وژل شوي او شاوخوا ۴۸ نور ټپيان دي.
نوموړی زیاتوي د مرګ ژوبلې ارقام وروستي نه دي او ښايي ډیر تغیر په کې راشي.
په ټپیانو کې ماشومان، میرمنې، او امنیتي منسوبین هم شامل دي.