تاند/ پنجشنبه د تلې – میزان ۲مه/ د افغانستان پخواني ولسمشر حامد کرزي د پاکستان له لوري د کندهار، خوست او پکتیا پر ځینو سیمو د وروستیو هوايي بریدونو په غبرګون کې له اسلاماباد غوښتي چې له افغانستان سره دې د ښه ګاونډیتوب لاره خپله کړي.
حامد کرزي نن (پنجشنبه، د تلې ۲مه) پر خپله اېکسپاڼه لیکلي چې، پاکستان له خپلې «منفي پالیسۍ» لاس نه اخلي او د دې پالیسۍ «اور» یې خپله لمن هم نیولې ده.
هغه ویلي چې افغانان د پاکستان د هغو څه پر وړاندې چې ده «تېری» بللی، له هر ډول توپیر پرته، په یووالي او اتحاد ولاړ دي.
د افغانستان پخواني ولسمشر یو ځل بیا د پاکستان له حکومت غوښتي چې له افغانستان سره خپلې اړیکې په «متمدنانه» ډول تنظیم کړي.
د یادونې وړ ده چې پاکستان نن سهار وختي د افغانستان پر ځینو سیمو بریدونه کړي دي.
طالب ویاند منلې چې، په دې بریدونو کې ۴ ملکیان مړه شوي دي.
پاکستان د روانې اوونۍ د دوشنبې په ورځ هم پر کونړ او پکتیکا هوايي بریدونه کړي وو، چې په پایله کې یې درې تنه مړه او څلور نور ټپیان شوي وو.
پاکستان وايي، د افغانستان پر لسو سیمو یې هوايي بریدونه کړي دي