تاند (شنبه، د اسد ۱۱) د فاریاب ولایت ځايي چارواکي وايي په دغه ولایت کې د یوې ترافیکي پېښې له امله ۷ کسانو ته مرګژوبله اوښتې ده.
د فاریاب د ترافیکو مدیریت مسؤلین وايي، یاده پېښه نن غرمه د فاریاب مرکز میمنه ښار کې رامنځته شوې چې په پایله کې یې د موټر چلوونکي په ګډون دوه تنه مړه شوي او پینځه نور ټپيان دي.
سرچینه کاږي د پېښې قربانیان ټول د یوې کورنۍ غړي وو او غوښتل یې له المار ولسوالۍ څخه د فاریاب مرکز ته لاړ شي چې ښار ته نږدې له یوې دروازې سره ټکر کړی دی.
د ترافیکو د پولیسو په خبره ډېر کله داسې پېښې ترافیکي اصولو ته د نه پاملرنې له وجې رامنځته کېږي.