تاند- په بریتانیا کې له ۷۰۰۰ نجونو او ښځو سره د خبرو پر اساس په یوه څېړنه کې ویل شوي چې په هرو ۱۲ ښځو کې یوه د جنسي مقاربت په مهال درد احساسوي.

په دې څېړنه کې په سلو کې اووه نیمو ویلي چې تل یې له جنسي مقابته وېره لرلې ده.

د دې څېړنې، چې د ۶ علمي انستیتیتونو د ۱۲ څېړونکو له لوري شوې، پایله د بریتانیا په (British Journal of Obstetrics and Gynaecology) خپرونه یا ژورنال کې چاپ شوې ده.

څېړونکي وايي چې د دې تحقیق هدف یې دا و چې معلومه کړي په بریتانیا کې د څومره ښځو لپاره جنسي مقاربت دردوونکی دی.

دوی له ۷۰۰ ښځو سره، چې عمرونه یې د ۱۶ او ۷۴ کلونو ترمنځ وو، مرکې وکړې.

د دې څېړنې یو هدف دا هم دی چې نارینه د ښځو له ستونزو خبر کړي او یوازې د خپل خوند په فکر کې ونه اوسي.

په څېړنه کې جوته شوې چې په ۷ نیم فیصده ښځو کې چې وايي د جنسي مقاربت په وخت درد احساسوي، اکثره د ۱۶ او ۲۴ کلونو او همداراز د ۵۵ او ۶۴ کلونو ترمنځ عمر لري.

د ښځو د تناسلي الې وچوالی، د جنسي مقاربت په وخت بېره او له جنسي مقاربته خوند نه اخیستل د دې سبب کېږي چې ښځې د مقاربت په وخت درد احساس کړي.