(فرخندې، رخشانې… ته)
جنايت و جنت
سپينه سپوږمۍ په تور شپاله کې
نغښتې
تورمخو وويشته په کاڼو
د جنت لپاره
خو چې يې سرو شهيدو وينو
وحشت وتوراوه
نو په دستور يې د هندوانو و سوه
او ايرې هم وروشيندلې سيندته…
ایا ورکړې دوی ته،
دا فتواکوم دين آيين
چې داور وينو جنايت په بدل
غلمان و حورې او جنت دي اړين!!؟
۹جنوري ۱۷
…
نور د سپېدو د سپېدارانو کاروان
د تورتمونو خونړۍ دښتې تر شا
پرې اېښي
سترگې پر لاره ورته
د سباوون د رڼوبيو باغچې
لندن، ۱۵جنوري۱۷
——————-
خپلې ستوريانۍ اوېستاته
ستا نننۍ اوکلنۍ کاليزه
زما پر زړه او ذهن
راووروي له اسماني کنگرو
يو لاهوتي شاعرانه شان الهام .
***
څو ښايسته ښکلې
سرې او شنې نانځکې
دا نازولې نازلوبولې
ځمکنۍ پرښتې،
د اسمانلارو د يانه په تکل
يوه يوه ورخېژوې
خپلې خيالي تشيال بېړۍ ته هسې…
***
لکه د نوح د ژغور بېړۍ په شان يې
په دې کوشنۍ پلاستيکي
بېړۍ پکې
غاړه غړۍ سره رانغاړې ټولې
او په دې هيله اسره
را وژغورې يې يو مخ
د ترهوړو ماڼوگانو له ډار ،
د مرگاني سمندر غلو،
سمندر رېږدو له گورت…
***
گوندې پيدا کړئ هورې
په بېلابېلو ستورياني سيمو کې
خپلې همزولې لوبتۍ ناوکۍ…
او دا پيغام دځمکنيو خويندو
ور واوروئ هغوی ته :
بس چې پرموږ يې
دا ناورين راوستی
او داخاورين ټاټوبی،
په اسوېلاندو غرغنډو کې
راته سره تبۍ کړ…
***
نو پام چې ستاسې نوراني سيمې هم
– د ٌ ستورو جنگٌ په نامه-
ستاسې له چپه خوله ډېريو
اوسېدونکو سره
يوځای له خپلو طاغوتي موخو
بلهارې نه کا…
***
گورئ ، تر هغې مخکې
چې مو دا خپل ٌسرغندهٌ ،
-کټ مټ زموږ ددې بړېڅو په څېر-
له دې بدوردو سړيخورو نړيخورو سره
ستاسې پر سر
څه پېر پلور وکاندې…
***
په بدرگه د ننگ و پت پرگنو
ورباندې ويرغالئ!
او هله وژغورئ بيا
له شومو پلونو ،
بدو سترگو
ښايسته ښکلې نړۍ،
نالاسوهلې او سپېڅلې نړۍ!!؟
پوهاند زيار- اکسفورډ، ۲۵جنوري ۱۷