تاند ( شنبه، د اسد ۴) روسي رسنۍ وایي، چې په دې هېواد کې د ایران ځانګړی سفیر په مسکو کې د افغانستان په اړه د روسیې د ولسمشر ځانګړي استازي ضمیر کابلوف سره لیدلي دي.
سرچینې زیاتوي دواړو لوري په افغانستان کې په وروستیو حالاتو غږیدلي.
د سرچینو د راپورونو له مخې دواړه خواوو په افغانستان کې د سولې له پروسې سره پرمرستو او ټینګار کړی دی او دغه راز یې ویلي، چې هڅه کوي د سولې په پروسه کې پوره مرسته وکړي.
د یادولو ده، چې له دې وړاندې امریکا ویلي د افغانستان د سولې په تړاو له ایران سره خبرو ته تیار دي.
زلمي خلیلزاد تېره ورځ د امریکا د سولې په انسټېټیوټ ویلي وو، امریکا له افغانستان څخه د خپلو سرتېرو ایستلو ته ژمنه ده، خو د سولې هوکړه باید عملي شي.
نوموړي همدا راز د ایران په اړه ویلي، چې دمګړۍ ایران د افغانستان د سولې له پروسې سره همکاري نه کوي، خو که ایران وغواړي امریکا پر دې موضوع خبرې ورسره کوي.
خلیلزاد داسې مهال له ایران سره د خبرو یادونه کړې وه، چې د دواړو هېوادونو اړیکې تر وروستي حده خرابې دي او یو بل ته سخت ګواښونه کوي.