د وزیر صاحب موټر هم زوړ و، هم زغره ور نه و. د امنیت ریاست د شدید ګواښ خبرداری ورکړ. وزیر صاحب چې تر دې دمه یې د بیت المال پر پيسو د زړه سوي په نامه د نوي موټر غوښتنه نه کوله، اړ شو ولسمشر ته یې د شته ګواښونو، د امنیت د راپور او د خپل اوسني موټر د تخنیکي ستونزو پر بنسټ رسمي غوښتنه وړاندې کړه او هغه دې هم خیر یوسي، بې له کومې ملاحظې یې ورته د نوي، زغره ور موټر د اخیستلو اجازه ورکړه.
وزیر صاحب چې د بیت المال پر هره پیسه دومره زړه سو لکه له خپل جېبه چې یې وځي، د اداري رییس د منتر تر اثر لاندې راغی او فیصله په دې شوه چې وزیر صاحب ته یو ښه، نوی موټر واخیستل شي.
د وزیر صاحب په مشرۍ یو نارسمي کمیسیون جوړ شو. اداري رییس، په مالي چارو کې د وزیر خاص سلاکار، د وزیر سکرتر، د تدارکاتو رییس ، د وزارت د پلان رییس او دوو نورو مشاورینو به هر مازیګر د وزیر صاحب په دفتر کې جلسه درلوده. اداري رییس او د تدارکاتو رییس به د ورځې یو یا دوه موټر پلورونکي لیدل، د موټرو مشخصات، د لازمو تخنیکي تغیراتو لست او بیې به یې راوړلې او کمیسیون به پرې خبرې کولې.
په مالي چارو کې د وزیر صاحب خاص سلاکار د موټرو شوقي و، او که له حقه تېر نه شو، د موټر په تخنیکي مسایلو هم ښه پوهېده. د اداري رییس او د تدارکاتو د رییس اوم او اتم راوړی وړاندیز هم په بېلابېلو دلایلو رد شو. دلته مشاور صاحب وویل چې د وزیر موټر باید ټول هغه تجهیزات ولري چې په یو موټر کې یې اړتیا احساسېږي:
– د وزیر صاحب موټر باید فول آپشن موټر وي!
د مازیګرنی مجلس یو دوو شوخو غړو د دې مجلس نوم بدل کړ.
– هلکه نن مازیګر څه کوې؟
– ښه خبر یې چې په شپږنیمو بجو فول آپشن مجلس دی!
د ښار ټول موټر پلورونکي وکتل شول خو داسې موټر پیدا نه شو چې د وزیر او مالي سلاکار له خوښې سره سم، لکه چې ښایي، فول آپشن و بلل شي.
اداري رییس یوه ورځ یوه عجیبه طرح وړاندې کړه چې لا ورته د چا پام شوی نه و. درې موټر وو چې هر یو یې په سلو کې شپېته د فول آپشن پر کنډه برابر راته. رییس صاحب درېواړه موټر پلورونکي سره د ښار په یو ستر رستوران کې کښېنولي وو او دې پرېکړې ته یې رسولي وو چې د درې واړو موټرو هغه برخې چې «فول آپشن» یې تکمیلولای شو سره یو ځای شي. د دې جوړجاړي په نتیجه کې چې هر موټر څومره ارزښت له لاسه ورکاوه، د تغیراتو لګښتونه، د درېواړو موټر پلورونکو د رضاییت بیه او (دا خبره نه کېده) د اداري رییس او د تدارکاتو د رییس د هڅو د قدردانۍ قیمت هم د موټر پر قیمت ورواچول شول. له یوې میاشتې مسلسلو مجلسونو، تحلیلونو او مشاجرو وروسته بالاخره هغه فول آپشن موټر د کابل په بازار کې پیدا شو چې د وزیر صاحب او په مالي چارو کې د خاص سلاکار صاحب له غوښتنو سره سم و.
سم دلاسه د چارو ادارې ته وړاندیز و لیکل شو. وزیر صاحب په خپله د چارو د ادارې رییس ته زنګ وواهه. اداري رییس او د تدارکاتو رییس دفتر په دفتر وګرزېدل. د مالیې وزارت موافقه هم واخیستل شوه. د سه شنبې په ماښام د فول آپشن کمیسیون خپله بریا په ډېره خوشالۍ و لمانځله. د فول آپشن کمیسیون لا په خپله خوشالۍ و چې د دفتر رییس په وراخطایې د وزیر صاحب دفتر ته را ننوت. پارلمان وزیر صاحب د پراختیایي بودجې د نه لګولو په جرم استیضاح ته بللی و.
د شنبې پر ماسپښین چې د وزیر صاحب موټر د وزارت پر دروازه راننواته، د ولسي جرګې رییس د استیضاح نتیجه اعلان کړه. نصاب یو سل او پنځه ویشت و. جرګې په یو سل او شپږ ویشت رایو وزیر صاحب له وزارته ګوښه کړ.
منلی صاحب!
دا فول آپشن خیل، ډیر پیشرفته فولیشان دی چه د ملک دی غربت او دملت ګوډ او مات حالت نشی لیدلی او فولیش خان ، فول آآپشن وسایل غواړی او فکر کوی چی د فامیل سره په اروپا یا امریکا کی لوی بزنس من دی!!! خدای جل جلاله دی عقل او دین ورکړی ،
مګر مناسبه به دا وی چه د د.بشردوست په طرح ، ملی بس کی تلی راتلی ،اوس بدبختانه حکومتی کرسی نازونعمت دی نه مسؤؤلیت ،خدمت او ربړی نو ځکه وایی :
وزیر شدن آسان است مګر آدمیت لازمی مشکل!! ووای بر بیخردان سفله