پوهاند ډاکتر مجاور احمد ریار
لمر و سپوږمۍ
کړې مالمر په وړانگو ته سپوږمۍ وړانگنه…
او چې تا تراشلي بوت مې بيا زړه يوړ،
نو خپل ناز خو پرما دومره گران مه پلوره!
۱۵نوېمبر۱۶
د نهنگانو په لمس
له نهيلۍ زمري لاسونه مروړي
چې گيدړان يې ورمېږونه مروړي
مرغوزي ژاړي په سرو سترگو مرغۍ
چې يې سره جاله توند بادونه مروړي
د تورو شپوگورو ځنگلو اهريمن
اهورايي سپين سهارونه مروړي
تورې څلې د ژمي خولې لگوي
سره ارغوان، ژيړ پاڼرېژونه مروړي
تورې سيلۍ پر سروباغچو رابلوسي
د ناوکيو تېر يادونه مروړي
د سباوون په سترگلينونو کې يې
د سوي بڼ ښېراز خوبونه مروړي
ټول اتپښيز د نهنگانو په لمس،
څه ښايسته ښکلي مرجانونه مروړي!
* مرغوزي= د مرغانو بچي، اتپښيز= اختاپوت
۱۸اکتوبر۱۶
گواهي
–۱–
وايي:
د لمر گامونه ستړي دي نور،
دي تښتېدلي يې د پلونو سپينې…
تورو تبجنو واټنونو يې
د کاروان ستورو له وراباڼو نه
پرېکون راوستی.
*
وايي:
د تل لپاره
ژمی د کال يوازېنی موسم دی.
د ډېرو وينو له بهاو ه ځنې
پلې او رگونه د تاکونو وچ دي…
او مرگ ناپايه داستان
د تندغري نارنجباغ د برخليک.
*
وايي:
تور بوږنوړي توپانونه گواښي
د ښار په گوټ گوټ کې
راپاتې نيم نيمزالې ويرژړلې شمې.
د گورو وريځو دېوان
د پسرلي پر ټوکېدا باندې باور نه لري،
د بنفشي باراني څاڅکو پر ځای
راوروي د سرپو شنې لوخړې…
–۲–
د نهيليو تورتمونو ترشا
په چم کوڅو کې لولنگره ،
آ د سپېڅلې پاک ايمان شپې پاڼه
راته گواهي لي پر رڼوپ د سپېدو،
د سپينو ورځو د راتگ له برمه…
نوره پاکېږي به د مينې وينې څښونکو
له خيرنو پلونو
پاک وسپېڅلي وربوی ،
آ يزداني آوېجه!!!
لندن، ۲۵دېسېمبر۱۶