تاند (جمعه، د اسد ۳) په کابل د امریکا سفارت وايي چې د بهرنیو چارو وزارت پرمختګ ادارې د کرونا ناروغۍ پر ضد د مبارزې لپاره څه باندې ۳۶،۷ میلیونه ډالر ځانګړي کړي دي.
په ورته وخت کې، د نړیوال بانک له لارې د کرونا وبا پر ضد د مبارزې پر مهال د افغانستان د روغتیا او پوهنې د سکټورونو او د ولایتي ادارو د ملاتړ لپاره یې د ۹۰ میلیونه ډالرو مرستې د سپارلو بهیر چټک کړی دی.
په کابل کې د امریکا سرپرست سفیر راس ویلسن وايي چې دغه مرسته یې په داسې حال کې له افغانستان سره کړې چې لا هم دغه هېواد کې د کورونا ناروغۍ اثرات شته او ورسره مبارزه روانه ده.
د نوموړي په خبره چې متحده ایالات د افغانستان حکومت، مرستندویه ټولنو، د بشري مرستو له شریکانو او نورو بېلا بېلو بنسټونو سره په اړیکه کې دی څو په افغانستان کې د دې وبا پر ضد د مبارزې لپاره د هغوی ملاتړ جلب کړي.
امریکا له افغانستان سره ددې مرستو خبر په داسې حال کې ورکړی چې په یاد هېواد کې د کرونا ناروغۍ له امله د مړو شویو کسانوشمېر نږدې څلور میلیونو ته رسېدلی دی.
د امريکا په متحده ايالتونو کی د کرونا له وجهې د مړو شمير ۱۴۷۰۰۰ او پدی وايرس د ککړو شمير څه باندی ۴ ميليونه دی.