تاند(پنجشنبه، د اسد ۲) د ولسمشر دوهم مرستیال سرور دانش د احصایې د ملي کمیټې په غونډه کې د بریښنایي تذکرو د وېش د پروسې ګړندي کولو باندې ټینګار وکړ.
دانش د احصایو د ملي کمېټې په غونډه کې وویل چې په ملي برنامو کې روڼتیا په هیواد کې کره شمیرو او احصایو ته اړتیا لري.
هغه د احصایې ملي ادارې ته لارښوونه وکړه چې د برېښنايي تذکرو د وېش پروسې ګړندي کولو، د پروسې ستونزې او خنډونه او د هغې د حل لارو چارو لټولو لپاره لیکلی پلان چمتو کړي، ترڅو د احصایې ملي کمیټې په راتلونکې ناسته کې وروستۍ پریکړه وشي.
د نوموړي په وینا، د مختلفو احصاییو شتون په پلان جوړولو او لویو ملي پرېکړو کې ګډوډي رامنځته کوي؛ نو د احصایې دفتر باید د ملي احصایې سرچینو او ارقامو انحصار او شفافیت په اړه یو شفاف میکانیزم ولري.
د اعلامیې پر اساس، پدې ناسته کې پریکړه وشوه چې د شمېرو روڼتیا میکانیزم د کمیټې په راتلونکې ناسته کې د اصلي اجندا په توګه بحث وکړي.
همدارنګه په دې ناسته کې د احصایې ملي کمیټې د هیواد ټولنیز او اقتصادي حالت په اړه احصایوي راپورونه وڅیړل.
د احصایې د ملي ادارې د راپور په وینا، په ۱۳۹۸ کال کې د هیواد نفوس ۳۲.۹میلیونه اټکل شوی و.
د یادې ادارې راپور ښیې چې پروسږکال ۵.۶ میلیونه هلکان او ۳.۶ میلیونه نجونې په عامه ښوونځیو کې زده کړې کړې دي، چې له دې څخه ۳۹ سلنه یې انجونې وې.