تاند (پنجشنبه، د اسد ۲) د ننګرهار ولایت سیمه ییز چارواکي وايي امریکايي پوځیان د ننګرهار په هسکه مېنه او اچین ولسوالۍ کې له خپلو دوو نظامي اډو وتلي دي او افغان ځواکونو ته یې سپارلي دي.
د چارواکو په خبره دغو اډو ته افغان پوځیان ورغلي تر څو د سیمې امنیت خوندي وساتي.
د ننګرهار د سرحدي پولیسو قومندان ویلي چې د امریکایي ځواکونو په تخلیه شویو نظامي اډو کې اوس سرحدي ځواکونه ځای پر ځای شوي دي.
ځايي خلک بیا ویره لري چې په دې سره به د یادې سیمې امنیت خراب او نا امنۍ به ډېرې شي.
خو په ورته مهال له دولت سره د همکارۍ ډاډ ورکوي او له حکومته غواړي چې له ولس سره په څنګ کې ودرېږي او د راپورته کېدونکو ګواښونو مخنیوي وکړي.
امریکايي ځواکونه په داسې حال کې خپلې نظامي اډې پریږدي چې د افغان ځواکونو پر وړاندې جګړه ورځ تر بلې زور اخلي او هره ورځ ګڼ شمېر ملکیانو او نظامیانو ته درنه مرګژوبله اوړي.