خبریال: الله نظر ترین
(پنجشنبه، د اسد ۲) د ننګرهار په خوګیاڼو ولسوالۍ کې د ۱۳ پاکستانیانو په ګډون ۴۶ طالبانو ته مرګژوبله واوښته.
د ننګرهار ولایت له مطبوعاتي دفتره په خپره شوې خبرپاڼه کې راغلي چې د خوګیاڼو ولسوالۍ په قیلغو سیمه کې د تېرې ورځې راهیسې د امنیتي ځواکونو له لوري د ځوابیه بریدونو په پایله کې د ۱۳ پاکستانیانو په ګډون ۳۱ طالبان وژل شوي دي، یو یې ژوندی نيول شوی او ۱۵ نور یې ټپیان شوي دي.
خبرپاڼه زیاتوي د ددولت د مخالفینو له لوري په امنیتي پوستو د برید پلان یې هم شنډ کړی دی، دغه راز د طالبانو لس عرادې وسایط، ګڼ شمېر وسلې او مهمات هم له منځه وړل شوي دي.
خبرپاڼه کاږي په یادو بریدونو کې ملکي خلکو او امنیتي ځواکونو ته کوم زیان نه دی اوښتی.
دغه راز د دولت د مخالفینو له لوري پینځه کړۍ ماینونه هم کشف او له منځ وړل شوي دي.
په ورته مهال د خوګیاڼو ولسوالۍ د قیلغو سیمې اوسیدونکي وايي چې د یادو بریدونو له امله وژل شوي کسان ټول ملکیان دي او تر څنګ یې ددوی کورونه ویجاړ شوي او څاروي یې ورته وژلي دي.
طالبانو تر اوسه د دغه بریدونو په اړه څه نه دي ویلي.
الله نظر ترین