تاند(یکشنبه، د سرطان ۲۹) د ۱۳۹۹ کال د کانکور عمومي ازموینه نن یک شنبه د چنګاښ په ۲۹ مه، ځانګړو روغتیایي تدابیرو په پام کې نیولو سره د سېد جمال الدین افغاني پوهنتون په انګړ کې د کونړ ولایت سرپرست والي، ولایتي شورا استازو، د ازموینې ملي ادارې پلاوي، پوهنتون استادانو او د شاګردانو استازو له خوا د سوالونو بکسونو په خلاصولو سره پیل شوه، چې درې ورځې به دوام وکړي.
د کونړ ولایت سرپرست والي ډاکتر ګل محمد بیدار وویل کانکور یوه ملي پروسه ده او د شفافیت تضمین لپاره یې ټینګ تدابیر نیول شوي دي.
ښاغلي بیدار وویل هغه ځوانان چې د کانکور له لارې د لوړو زده کړو مستحقین دي، د واسطې پرته به د زیارونو په اساس د خپلې خوښې پوهنځیو ته لاره پیدا کوي.
نوموړي له ګډونوالو هم وغوښتل چې د کمېټې لارښوونو ته پام، حفظ الصحه او نظم مراعت کړي.
د ازموینې ملي ادارې د تخنیکي چارو سرپرست رئیس پوهنیار ارسلاخان حقمل وویل د شل سلنه ښځینه وو په ګډون ۴۱۹۰ تنو د ازموینې لپاره نومونه ثبت کړي او له جملې یې ۳۹۰۰ تنو بایو میټریک کړی، چې د روانې میاشتې په ۲۹/ ۳۰ او ۳۱ مو نېټو به ترې ازموینه واخیستل شي.
د سېد جمال الدین افغاني پوهنتون رئیس پوهنیار دکتور محمد ګلاب عمري بیا د کانکور ازموینې د ښه ترسراوي لپاره د ډاډمن او صیحي چاپیریال رامنځته کیدو په برخه کې د ولایت مقام، پوهنتون ادارې استادانو او ټولو هغو ادارو مننه کوي، چې د دغې ملي پروسې د ښه ترسراوي لپاره یې ورسره د همکارۍ ملا تړلې ده.
په ځینو ولایتونو کې دا ازمویني په داسې حال کې اخېستل کیږي چې د کرونا او قرنطین له امله څو میاشتې کیږي چې ټولې تعلیمي ادارې تړل شوې او د کانکور له ازمویني سربیره د ښوونځینو او پوهنتونو ازمویني او درسي نصابونه هم ځنډېدلي دي.