تاند (شنبه، د سرطان ۲۸) په پکتیا کې د سیکانو د زیارتونو د ترمیم او ساتنې مسؤل نیدان سینګ خوشې شو.
په ختیځه حوزه کې د سیکانو د زیارتونو د ترمیم او ساتنې مسؤل او د دې توکمیز او مذهبي لږکي غړی نیدان سینګ، چې په دې وروستیو کې د پکتیا په څمکنیو ولسوالۍ کې تښتول شوی و، بېرته خوشې کړی شو.
د هند د بهرنیو چارو وزارت د نیدان سینګ د خوشې کېدو هر کلی کړی دی.
د یاد وزارت ویاند په خپله ټوېټر پاڼه له ټولو اړوندو مسؤلینو مننه کړې چې د نوموړي په خلاصون کې یې مرسته وکړه.
نیدان سینګ د جوزا په ۲۷ د څلور تنو وسله والو له لوري داسې مهال تښتول شوی و، چې د پکتیا په څمکنیو ولسوالۍ کې د هندوانو مربوط یوه عبادت ځای ته تللی و.
د څمکنیو ولسوال وايي له پیله یې شک درلو چې نیدان سینک د ځمکو د غاصبینو او یا د انسان تښتوونکو لخوا تښتول شوی، خو په دې تړاو د پینځو تنو تر نیول کېدو وروسته معلومه شوه چې نوموړی د طالبانو له لوري تښتول شوی و.
نیدان سینګ له خپلې کورنۍ سره په هندوستان کې ژوند کوي، چې له اختطاف کېدو درې میاشتې وړاندې افغانستان ته راغلی و.