تاند (چهارشنبه، د سرطان ۲۵) د بلوڅ جنګیالیو په یوه برید کې درې پاکستاني پوځیان وژل شوي دي.
د بلوچستان په پنچګور سیمه کې د پاکستاني ځواکونو کاروان له یوه سخت برید سره مخ شوی چې پر مهال یې د بلوچستان په پنچګور ولسوالۍ کې درې پاکستاني پوځیان وژل شوي او اته نور ټپیان دي.
د پاکستان پوځي چارواکو رسنیو سره په خبرو کې ویلي چې یاد برید د پنچګور اړوند ګیچک ساحه کې شوی دی.
دوی زیاته کړې په ټپیانو کې د پینځو تنو روغتیايي حالت یې د ډاډ وړ نه دی.
چارواکو ویلي دوی د ګزمې په حال کې وو، چې له برید سره مخ شول.
ددغه برید مسؤلیت د بلوچستان ازادۍ جبهې ډلې منلی او وايي، چې په دغه برید کې یې پاکستاني عسکرو ته درنه مرګژوبله اړولې ده.
تر دې وړاندې د پاکستان پوځ ویلي وو، چې ډيورنډ کرښې ته نژدې په شمالي وزیرستان کې یې د پوځ او سختدریځو تر منځ نښته کې ۴ پوځیان وژل شوي دي.
د پاکستان پوځ وايي، په وزیرستان کې ۴ سختدریځي او ۴ پوځیان ووژل شول