تاند ( دوشنبه، د سرطان ۲۳) د هرات په ولایت کې روباټ جوړوونکو نجونو خپله جوړه کړې تنفسي دستګاه نندارې ته وړاندې کړه.
د روباټ جوړونکو نجونو له لوري دا جوړه شوې تنفسي دستګاه د تنفس د شمېر تنظیم، چټکتیا او فشار ځانګړتیاوې لري.
دوی وایي دا دستګاه به دطبي مرکزونو له تایید وروسته بازار ته وړاندې شي.
روباټ جوړونکې نجونې وایي دوه دا هڅه د کورونا د پيل سره سم پيل کړه او بریالي شول چې دا دستګاه جوړه کړي.
همدا راز په دې نندارې کې د میکروب ضد مایع، لوبې او د کورونا اړوند ویډیو ګانې هم وړاندې شوې.
د هرات والي سید وحید قتالي هم د یادو نجونو هڅې ستایلي او ډاډ یې ورکړ، چې هر راز مرسته به ورسره ترسره کړي.
تر دې وړاندې د افغانستان د مخابراتي خدمتونو د تنظیم ادارې هم د تنفس بریالۍ دستګاه جوړه کړې وه.