تاند (شنبه، د سرطان ۲۱) یوه تازه څېړنه ښيي چې د نري رنځ یا ټي بي واکسین د کورونا ناروغۍ له مخنیوي سره مرسته کوي.
د سي این این تلویزیون د راپور له مخې، څېړونکو موندلې، په هغو هیوادونو کې چې ډېرو خلکو د نري رنځ پر ضد واکسین شوي، لږ کسان په کووید نولس اخته شوي دي.
دوی وايي، د دې معنا دا نه ده چې د نري رنځ واکسین د کورونا په وایرس د هغو اخته کسانو درملنه کوي چې ناروغي یې شدیده وي خو په مجموع کې د کورونا په وړاندې د خلکو معافیت زیاتوي او احتمالاً یې په دې وایرس د اخته کېدو مخه نیسي.
د امریکا د ویرجینیا د پولتخنیک انستیتوت او کالج څېړونکی لوییس ایسکوبر د هغو هیوادونو معلومات او ډاتا سره پرتله کړې چې د نري رنځ (TB) واکسین ډېرو خلکو کړی او هغو چې لږ دا ډول واکسین یې کړی دی.
دی وايي، په اکثرو اسیايي هیوادونو کې د نري رنځ پر ضد خلک واکسین کېږي خو د امریکا په متحدو ایالتونو کې خلک د نري رنځ واکسین نه کوي.
د نري رنځ د واکسین په اړه ویل کېږي چې ۱۰ کاله دوام کوي خو ځینې څېړنې ښيي چې ممکن ۲۰ کاله یې اثر دوام وکړي.