خبریاله (عاقله اسد (چهارشنبه، د سرطان ۱۱) د هلمند ولایت د کرنې، اوبولګولو اومالدارۍ ریاست چارواکو ویلې، د دې ولایت په څېړنیز فارم کې پر یوشمېر نوو نباتاتو څېړنې روانې دي چې له دې ډلې د املوکو، کېلو، نارنجو او لیمو نیالګي هم تر څېړنې لاندې نیول شوي دي.
د کرنې او مالدارۍ وزارت له خبرپاڼې سره سم، د هلمند ولایت د کرنې، اوبولګونې او مالدارۍ رییس زلمی الکو وایي، دوی هلې ځلې کوي چې په دې ولایت کې د کوکنارو د کرکېلي د مخنیوي لپاره بزګرانو ته نوی ارزښتناک کرنیز بوټي او ونې وروپېژني.
ښاغلي الکو وويل، په همدې موخه د دې ولایت په څېړنیز فارم کې د املوکو، کېلې، نارنجو او لیمو نیالګي اېښودل شوي او پرې څېړنې روانې دي.
هغه زیاته کړه، تېر کال د ننګرهار له ولایت څخه اصلاح شوي نیالګي، چې په ترکیب کې یې پنځه ډوله لیمو، مالټه او املوک شامل دي د بولان په څېړنیز او انار باغ په قوریه کې کرل شوي دي چې ښې پایلې یې ورکړې دي.
د یاد وزارت په وینا، د هلمند د کرنې، اوبولګولو او مالدارۍ ریاست په دې ولایت کې د بزګرانو د ملاتړ او د کوکنارو د کرکېلي د بدیل پیداکولو په پار تل هلې ځلې کوي او په دې برخه کې یې ګڼ شمېر بریالي پروګرامونه هم پلي کړي دي.
د کرنې وزارت وایي، هلمند کې د املوکو، کېلې، نارنجو او لیمو مورني بڼونو تر دا مهاله ښه او ګټوره پایله ور کړې ده.
د عامو خلکو په وینا پر هلمند سربیره که د هیواد په نورو ولایتونو کې هم دغه ډول اقدام وشي او له بزګرانو سره په تخمونو کې مرسته وشي د ټول هیواد لپاره به مثبت او ګټور تمام شي.