تاند، پنجشنبه، د سرطان ۵مه: د ولسمشر لومړی مرستیال امرالله صالح وايي، کله چې دی د کورنیو چارو سرپرست وزیر و، په ۲۷ کاري ورځو کې یې کابل کې د جرمونو کچه صفر کړې وه.
نوموړی وايي، د جرمونو د زیاتوالي یوه اساسي وجه دا ده چې په هېواد کې ښځینه پولیسې کمې دي او له همدې کبله حکومت خپلو ۵۰ سلنه وګړو ته لاسرسي نه شي کولای.

نوموړی پر خپله فیسبوک پاڼه لیکي چې د ده په وخت کې له مجرمینو سره جدي چلند کېده: (( زه ۲۷ ورځې وزیر وم او په ۳۴مه ورځ کابل کې جرمونه صفر شول.))
ښاغلی صالح لیکي پولیس یې پر دې پوه کړي وو چې د دوی دنده د جرمونو مخنیوی دی: (( ما ورته ویلي وو چې تاسې یوازې نه یاست وزارت د غره په څېر ستاسې تر شا ولاړ دی، هغوی په دریو اوونیو کې درک کړه چې وسله یې مقدسه ده او په دې پوه شول چې څوک په نښه کړي؟))

د امرالله صالح دا څرګندونې وروسته له هغې شوي دي چې د ده یو غږیز پیغام خپور شو او په کې د کورنیو چارو وزارت د سرپرستۍ پر مهال صالح خپل یو پولیس منصبدار ته امر کوي چې څوک موټر درته ونه دروي، ویې ولئ: (( له والي مه دارېږئ، له وکیل مه ډارېږئ، چا چې درته په لویه لار موټر ونه دراوه ویې ولئ، زما دفتر ته یې راوړئ، مسوولیت یې زه اخلم.))

امرالله صالح د دغه غږیز کلیپ په اړه څه نه دي ویلي، خو تر دې وړاندې یې دفتر ویلي وو چې دا کلیپ جعلي دی.