تاند، چهار شنبه، د سرطان ۴ مه: د کورنیو چارو وزارت په کورونا ناروغۍ د اخته پولیسو او د هغوی د کورنیو غړو د درملنې لپاره ۲۰۰ بستریز ځانګړی روغتون پرانیست.
دغه روغتون د پولیسو ۳۰۰ بستریز روغتون ته څېرمه افتتاح او په فعالیت یې پيل وکړ چې ټولې ۲۹۰ میلیونه افغانۍ یې په جوړولو او تجهیز لګېدلي او د رغونې چارې یې په دوه میاشتو کې بشپړې شوې دي.
د کورنیو چارو سرپرست وزیر محمد مسعود اندرابي د دې روغتون د پرانیستي پر مهال ویلي، چې د ملي پولیسو د منسوبینو او کورنیو د درملنې لپاره د یاد روغتون جوړول یوه اړتیا وه او ټينګار یې وکړ، چې د پولیسو هغه منسوبین او کورنۍ یې چې پر کورونا ناروغۍ اخته شوې وي، پدې روغتون کې به یې درملنه کېږي.
کورنیو چارو وزارت وایي، په هرات، ننګرهار، بلخ، کندهار، هلمند او پکتیا ولایتونو کې به هم په نږدې ورځو کې پر کورونا ناروغۍ د اخته پولیسو منسوبینو لپاره په روغتیايي تجهیزاتو سمبال شوي پنځوس بستریز روغتونونه فعالیت پيل کړي.