تاند، دوشنبه، د سرطان ۲ مه: ځايي چارواکي او د سوداګرۍ خونې مسولان وایي، نن له افغانستان څخه پاکستان ته د صادراتو لړۍ رسماً پيل شوه.
د سوداګرۍ خونې مرستیال خان جان الکوزی وایي، پاکستان هوکړه کړې چې د یو خاص میکانیزم له مخې به پاکستان ته د افغان مالونو د انتقال اجازه ورکوي.
نوموړی وایي، له دې وروسته به د غلام خان بندر، بولدک او تورخم بندر به په اونۍ کې د وارداتو او صادراتو لپاره شپږ ورځې خلاص وي. افغاني مالونو ته به د یو خاص میکانیزم له مخې اجازه ورکول کیږي چې هغه پاکستان ته تیر شي.نن رسماً دغه لړۍ شوېده.”
ښاغلي الکوزي وویل چې د تیرو شااوخوا څلورو میاشتو راپدېخوا پاکستان ته د افغان صادارتو لړۍ بنده شوې وه.
د افغان سوداګرو په وینا په دغه مواده کې د صاداراتو او وارداتو د بهیر ټکني کېدو له امله د دواړو خواو سوداګرو ته لوی اقتصادي زیانونه اوښتې دي.
بلخوا د ننګرهار سیمه ییزو چارواکو هم نن دوشنبه له یاد ولایت څخه پاکستان ته د افغان صادراتو د لړۍ پیلېدو خبر ورکړی دی.
د ننګرهار د والي ویاند عطاءالله خوګیاڼی تاند ته وایي، نن لس بجې رسماً ننګرهار څخه د تورخم له لارې کوزې پښتونخوا او پاکستان ته صادرات پيل شول او لومړی موټر په تورخم واوښت
ښاغلي خوګیاڼي ویلي چې د تورخم دروازه به د صاداراتو او وارداتو لپاره دوه طرفه خلاصه وي.
په اسلام اباد کې د افغانستان سفیر عاطف مشعل تیره اونۍ وویل چې ټاکل شوې بله اوونۍ به د تورخم، سپین بولدک – چمن او غلام خان د بندرونو له لارې پاکستان ته د افغان سوداګرو د مالونو صادرات پیل شي.
پاکستان د روان ۲۰۲۰ میلادي کال د مارچ د میاشتې په سر کې لومړی د چمن – سپین بولدک او بیا د مارچ په نیمايي کې د تورخم بندر د کرونا ویروس د وبا د خپریدو د مخنیوي د هڅو په لړ کې وتړل.
که څه هم له نږدې دوو میاشتو راهیسې پاکستان د تورخم او چمن – سپین بولدک بندرونه افغانستان ته د ترانزیتي مالونو د وارداتو پرمخ پرانیستي، خو په تیرو شاوخوا دریو میاشتو کې د افغانستان څخه پاکستان ته هر ډول صادرات بند شوي وو.