تاند (شنبه، د جوزا ۳۰) د پروان ولایت په جبل السراج ولسوالي کې د دوو نجونو مړي، چې په مرموز ډول وژل شوې، موندل شوي دي.

د پروان د والي ویندویه وحیده شهکار وايي، پولیسو تېرماښام د دغو دوو نجونو مړي د جبل السراج ولسوالي په تګلر سیمه کې وموندل.

اغلې شهکار وویل چې تراوسه پورې پولیس نه پوهېږي چې دا نجونې څوک دي یا د کومې سیمې دي خو تحقیقات یې پیل کړي دي.

د نجونو مړي د چاریکار دوه سوه بستري روغتون ته وړل شوي دي.

تراوسه د هغوی د وژل کېدو په تړاو څوک نیول شوي نه دي او نه د هغو د وژل کېدو د انګېزې په اړه څه ویل شوي دي.

په افغانستان کې د ناموس په نوم نجونې او ښځې وژل کېږي خو د پروان د جبل السراج په شمول په یو شمېر سیمو کې نامسوله وسله وال ډېر دي او دا کسان له ناموسي تېریو رانیولې تر وژنو پورې په راز راز جرمونو تورن دي.