افغانستان د منځنۍ اسیا نورو هیوادونو ته هم تریشل ماشینونه صادروي

تاند، شنبه، د جوزا ۳۱مه: په ننګرهار کې د جاوېد افغان شرکت وايي، د دوی له لوري جوړ شوي ترېشرونه په لومړي ځل تاجکستان ته صادر شوي دي او راتلونکي کال ته به یې ازبکستان، قزاقستان او قرغزستان ته هم واستوي.

د یاد شرکت مشر تور ملنګ شګیوال وايي،  ۱۲ ترېشر ماشینونه‌یې چې غنم له بوسو بېلوي، تاجکستان ته استولي دي.

د شګیوال په خبره، په تاجکستان یې هر ماشین په ۲۰۰زره افغانۍ پلورلی دی او د دې ماشین الاتو ۷۵ سلنه خام مواد د افغانستان خپل دي: ((د یاد هر تهریشر وزن ۱۷۵۰ کیلو ګرامه دی چې هر یو یې ۲ دوه سوه زره افغانۍ قیمت لري چې څلور یې یو ځل او اته نور یې د دویم ځل لپاره یاد هېواد ته صادر شول.))

ښاغلی شګیوال زیاتوي: (( موږ د اوسپنې د ویلي کېدو فابریکه لرو چې د دې ماشین الاتو پرزې جوړوي او پاتې پرزې له چین او ترکیې واردوو.))

دی وايي، اوس‌مهال یې خپل تولیدات د هېواد ګڼو ولایتونو ته لېږلي او په ګڼو ولایتونو کې خلک د دوی له تولید شوو ترېشرو څخه کار اخلي: (( هڅه کوو چې په راتلونکي کال کې خپل تولیدات ازبکستان، قزاقستان او قرغزستان ته واستوو او هم خپل کورني بازارونه خپل کړو.))

په ننګرهار کې د جاوېد افغان په نامه شرکت د اوسپنې د ویلي کېدو د فابریکې ترڅنګ د غنمو، جوارو او نورو کرنیزو برخو کې ماشینونه جوړوي او اوس یې بهرنیو هېوادونو ته هم استوي.