تاند، سه شنبه، د جوزا ۲۰مه: له ډیورند کرښې سره نږدې د چمن هغې غاړې ته له یو قرنطینیه کمپ څخه ۲۰۰ ښځې، ماشومان او نارینه تښتېدلي دي.

راپورونه وايي، په دغه کمپ کې یوه مېرمنه سخته ناروغه وه او کورنۍ یې غوښتل چې هغه روغتون ته ورسول شي چې د کمپ مسوولانو ورسره نه ده منلې او له کبله یې له قرنطین شویو کسانو سره د کمپ د عملې اخ و ډب هم رامنځته شوی دی.

له فزیکي شخړې وروسته په کمپ کې ایسارو خلکو دروازه ماته کړې ده او ناروغه میرمن یې ایستلې ده.
مسوولان وايي، په کمپ کې ایسار خلک راجستر نه وو له همدې کبله یې له دوی سره کوم ریکارډ هم پاتې نه دی.

د سرچینو په وینا په کمپ کې ایسارو خلکو له دوه ورځو راهیسې دا شکایت هم درلود چې سم خواړه نه ورکول کېږي له همدې کبله یې د نه خوړو اعتصاب هم کړی و.
مسوولان وايي، دا خلک له افغانستان څخه پاکستان ته اوښتي وو.