د ورځپاڼي مالک په حاکمانه انداز خبره پیل کړه
په کار ده ورځپاڼه په تاوان کي پاته نسي
د دولتي آدابو او ګټو به هر اړخیزه خیال ساتو
پرون موږ ته د موضوع ستونځه را ترغاړه وه
خو اوس د موضوع د نشتوالي نه
د موضوع د انتخاب ستونځه راپېښه ده
یو داسي موضوع
چي په چوپتیا کي وحشت خپور کړي
او فکري ډارن وروزي
په ولس کي ډار او وحشت خپورکړي
چي :
(یو زوی مور او پلار په ډزو ووژل …..
یو پلار خپل ماشومان د غربت له کبله
حلال کړل !
خاوند خپله میرمن د اشنا په تور په مرمیو وویشتله
د سړک د غاړي په چاودونه کي
د واده د ورا موټر والوتو
اکثریت سوځلي مړي د میرمنو او ماشومانو دي )
د یوې سرکار پلوه ورځپاڼي د چلوونکو
دا مسولیت دﺉ چي واقعیتونه به زندۍ کوي
ولس ته به شکمنې خبرې رسوي
د مثال په توګه طالب وسلوال یو سړک الوزوي
د مکتب په ماشومانو تیزاب ورشیندي
د بدلمنۍ په تور میرمني وژني
نو به ټکی طالب نه (وسلوال مخالفین) کاروي
پروپېګنډه نیمه ګټلې جګړه ده !
د ورځپاڼي د مالک حرصمندي او له زهرو ډکي خبري
زیاتي کړوونکي هم ځورونکي وې
یو ډول ذهني او روحي اضطراب یې درلود
د کافي شاپ پر مېز پرتې ورځپاڼي ته مي نظر ورواوښت
(وسلوالو مخالفینو د ښار دوه ښوونځي والوزول )