تاند، چهارشنبه، د جوزا ۱۴مه: د عامې روغتیا وزارت وايي، د روسیې له لوري افغانستان سره ۵ زره د کورونا د تشخیصیه کیټونو مرسته وشوه.
د عامې روغتیا وزارت مرستیال بشیر نورمل وايي، دغه مرسته په کابل کې د روسیې د سفیر دیمتري ژرنوف لهخوا د افغانستان د عامې روغتیا وزارت په واک کې ورکړل شوې ده.
د نورمل په خبره، د روسیې له لوري مرسته شوي روغتیايي توکي به د کابل په ګډون نورو ولایتونو ته هم ولېږل شي او د کورونا په مخنیوي کې به ترې ګټه پورته کړای شي.
له دې وړاندې د نړۍ ګڼو هېوادونو له افغان حکومت سره د کورونا په مخنیوي کې د مالي مرستې تر څنګ د ګڼو روغتیايي توکو مرستې هم کړي دي.
تراوسه له افغان حکومت سره د بېلابېلو نړیوالو بنسټونو له لوري ۹۴۰مېلیونه امریکايي ډالر مرسته شوې او سلګونه ټنه د روغتیايي توکو مرسته د چین، متحده عربي اماراتو، روسیې او نورو هېوادونو له لوري شوې ده.