تاند، چهارشنبه، د جوزا ۱۴مه: د فارياب ولایت پوليس وايي، تېر مازیګر دغه ولایت په خواجه سبز پوش ولسوالۍ کې د کروندګرو د بې پامۍ له امله په ۱۵ هکتاره ځمکه د غنمو کروندو اور اخیستی او سوځېدلې دي.
د فاریاب د پولیسو ویاند عبدالکریم یورش وایي، د خواجه سبزپوش لوړ کوتل سیمه کې یو بزګر اور بل کړی او د بې احتیاطۍ له کبله یې ترې نږدې کروندو ته سرایت کړی دی: (( یو بزګر د مار لپاره په خپل پټي کې اور بل کړی او بیا اور له کنټروله وتلی دی)).
د نوموړي په خبره د اور له کبله نږدې و چې ۵۰ هکټاره غنم وسوځي خو وروسته چې د اور وژنې عمله سیمې ته ور ورسیده، اور یې قابو کړی دی او د لوی زیان مخه یې نیولې.
نوموړی وایي، د اور وژنې د عملې له هڅو سره سره بیا هم له ۱۰ تر ۱۵ هکټارو پورې ځمکه باندې کرلی د غنمو فصل سوځېدلی دی.