تاند، یکشنبه، د جوزا ۱۱ مه: د هرات چارواکي وایي، په دغه ولایت کې په یوې ترافیکي پیښه کې د یوې کورنۍ اته غړي وژل شوي دي.
د هرات د والي ویاند جیلاني فرهاد تاند ته خبر تایید کړی او وایي، دا پیښه تیره شپه د هرات – ادرسکن ولسوالۍ مربوطاتو کې د هرات – کندهار پر لویه لاره شوې ده.
د هرات د والي ویاند جیلاني فرهاد زیاته کړه چې په قربانیانو کې درې ماشومان ، درې میرمنې او دوه سړي شامل دي.
د هرات د والي ویاند وویل چې ټول قربانیان د کاپیسا ولایت اوسیدونکي وو خو معلومه نه ده چې هرات ته د څه لپاره تللي وو.
نوموړی وایيے یو ماشوم هم په دې پیښه کې سخت ټپي شوی او روغتیایي وضعیت یې ښه نه دی.
دا په داسې حال کې ده چې د افغانستان په لویو لارو ټکرونه او ترافیکي پېښې له ترهګرۍ وروسته د ملکیانو څخه په دویمه درجه کې زیاته قرباني اخلي.