تاند، یکشنبه، د جوزا ۱۱مه: د ملکي هوايي چلن خپلواکه اداره وايي، د ننګرهار د هوايي ډګر جوړولو لپاره یې د ۷۹ میلیونه او ۹۰۰ زره ډالرو د پروژې تړون یې لاسلیک کړ.

د دغې ادارې مشر قاسم وفايي زاده تاند ته تایید کړه چې دغه قرارداد لاسلیک شوی او له مخې به یې د ننګرهار هوايي دګر لپاره په موډرن ډول ترمینل او د الوتکو ځغاستلیکه جوړه کړای شي.

نوموړی وايي، د ننګرهار هوايي ډګر لپاره جوړ شوی ترمینل به د هېواد د معمارۍ د فرهنګ واقعي ښکارندويي وکړي: (( په ترمینل سربیره به چاردیوالی، امنیتي برجونه او نور محتویات هم په کې جوړ کړای شي چې دا به بشپړ یو معیاري هوايي ډګر وي.))

د قاسم وفايي زاده په خبره دا پروژه افغان ګلوبل عملیاتي شرکت ته سپارل شوې او کارونه به یې ژر پیل شي: (( له دغه هوايي ډګر څخه به د کابل د هوايي ډګر په څېر په اضطراري حالاتو کې د ولایتونو وصل لپاره هم استفاده کېږي.))

نوموړی زیاتوي چې د ننګرهار هوایي ډګر په جوړېدو به د افغانستان دختیځو ولایتونو کرنیز صادرات او محصولات د سیمې او نړۍ بازارونو ته هم د هوايي دهلېز له لارې انتقالېږي.

د ننګرهار هوايي ډګر جوړول د ولسمشر یوه مهمه ژمنه وه چې د ننګرهار خلکو ته یې په تېرو دوه کمپاینونو کې ورکړې وه خو څه موده وړاندې د ولسمشر سلاکار فاضل محمود فضلي خبر ورکړ چې د دغه هوايي ډګر د جوړولو لپاره یې په دریو ځایونو کې سروې پیل کړې ده او د ګمبیري دښته ورته مناسبه بلل شوې.