تاند، شنبه، د جوزا ۱۰ مه: د کونړ د کرنې ریاست چارواکي وایي، سږکال په دغه ولایت کې د شفتالو حاصلات په بېساري ډول څه کم څلور سوه ټنه شفتالو تولید شوي او بڼوالو ته یې مېلیونونه افغانۍ عایدات رسېدلي دي.
د یاد ریاست د مسوولینو په خبره، په دې ولایت کې د خصوصي پانګوالو له لوري د بڼوالۍ په برخه کې د پانګونې لېوالتیا ورځ تربلې په پراخېدو ده.
د کونړ د کرنې رئیس نجیب الله عادل وایي چې دغه ولایت کې د مالټې، لیمو او نارنج ترڅنګ د کرنې ریاست په تخنیکي همکاریو د پانګوالو له لوري په ۹۵۰ جرېبه ځمکه کې د شفتالوانو بڼونه جوړ شوي، چې سږکال د ۲۷۰ جرېبه ځمکې باغونه په حاصلاتو راغلي.
نوموړی وایي چې د شفتالوانو بڼونو له درکه خلکو ته د کاري اسانتیاوو ترڅنګ بڼوالو ته ۸.۲ مېلیونه افغانۍ په لاس ورغلي.
ځايي بزګران وايي، د کرنې په برخه کې د پانګونې له امله خلکو ته کاري فرصتونه برابر شوي او په ښه کیفیت یې مېوه بازار ته وړاندې کړې ده.
د بزګرانو په خبره، په کونړ کې په ۲۶۰ جرېبه ځمکه د شفتالو بڼونه جوړ شوي، خو د مېوو د ساتنې او بسته بندۍ په برخه کې د دولت د پاملرنې غوښتنه کوي.
د کونړ د کرنې ریاست چارواکي وایي دوی هلې ځلې کوی، چې په دې ولایت کې د بڼوالۍ لمن پراخ او د بېلابېلو مېوو نوي بڼونه جوړ کړي.
کونړ یو غرنی ولایت دی او د نورو سیمو په پرتله د کرنې لپاره کمه ځمکه لري.