د عامې روغتیا وزارت وايي، په تیرو ۲۴ ساعتونو کې ټول هیواد کې د کورونا ویروس ۸۶۶ نورې مثبتې پېښې ثبت شوي دي.
یاد وزارت نن شنبه تاند ته په ورکړې معلوماتې پاڼه کې ویلي چې په تیرو ۲۴ ساعتونو کې د کورونا ویروس د ۱۴۲۵ مشکوکو سمپلونو معاینات تر سره شوي چې ۸۶۶ یې مثبت وو او په دې سره افغانستان کې د کورونا مثبتو پېښو شمېر ۱۴۵۲۵ ته رسېدلی.
له یادو پېښو څخه ۴۱۱ په کابل،۱۷۷ په هرات، ۳۹ بلخ، ۳۵ننګرهار، ۲۸ پکتیا،۲۶ بادغیس،۱۹ بغلان،۲۹ تخار، ۱۰ غزني، ۱۹ لوګر، ۳ میدان وردګ،۲۷ پروان، ۱۶ کندز، ۶ پنجشیر،۱۵ کاپیسا،۲ فاریاب او ۴ بدخشان کې ثبت شوې دي.
دغه وزارت ویلي چې په تیره یوه شپه او ورځ کې په پکتیا، لوګر او فراه ولایتونو کې د کورونا ویروس له امله درې تنه مړه شوي چې په دې سره د ټولو مړو شوو کسانو شمېر ۲۴۹ تنو ته پورته شوی.
همدارنګه ۴۴ تنه بیرته روغ شوي چې په دې سره د ټولو روغو شویو کسانو شمېر ۱۳۰۳ تنو ته ورسېد.
په افغانستان کې له تیرو لسو ورځو راهیسې په کوروناویروس د اخته کسانو شمېر په بېساري ډول مخ په زیاتېدو دی خو د افغانستان د عامې روغتیا وزارت له دغه ویروس سره د مبارزې په برخه کې د طبي تجهیزاتو د کموالي خبرداری ورکړی دی.
د کورونا ویروس په لومړي ځل د ۲۰۱۹ د ډسمبر په میاشت کې د چین د هوبي ایالت د ووهان په ښار کې خپور شو.
په امریکا کې د جانس هاپکینز د پوهنتون د معلوماتو په اساس د کرونا ویروس د شنبې تر سهار پورې ۳۶۵۰۱۱ کسان مړه کړي او نژدې شپږ میلیون نور پرې اخته شوي دي.