تاند، شنبه، د جوزا ۱۰ مه: ولسمشر غني نن له غرمې مخکې په ځانګړو مراسمو کې د افغانستان لپاره د روسیې د نوي سفیر دمیتري الکساندروویچ ژیرنوف باورلیک ومانه.
جمهوررئیس هغه ته په نوي ماموریت کې د بریالیتوب هیلې څرګندولو ترڅنګ وویل، په تېرو پنځو کلونو کې افغانستان د منځنۍ اسیا هیوادونو سره چې د افغانستان مهم شریکان دي، اړیکې پراخې کړي او هر کال دې هیوادونو ته زرګونه ټنه کرنیز محصولات صادروي، خو په وینا یې اړتیا ده چې د دواړو هیوادونو (روسیې ـ افغانستان) مناسبات هم لا زیات غښتلي شي.
ولسمشر وویل: ((موږ د منځنۍ اسیا هیوادونو څخه افغانستان ته انرژي واردو او غواړو خپلو محصولاتو ته نورې لارې هم پرانېزو په ځانګړي ډول د روسیې بازارونو ته، ترڅو وچې میوې او نور توکي ورته صادر کړو. موږ له سیمې او روسیې سره د اقتصادي همکاریو د زیاتېدو غوښتونکي یوو.))
ولسمشر غني ټینګار وکړ چې، راتلونکې ته یې لیدلوری دا دی چې په افغانستان کې ریل پټلۍ سرتاسري شي او بهرنیو بازارونو ته د افغاني محصولاتو د صادرېدو زمینه برابره شي: ((همداراز افغانستان او روسیه به د سیمه ییزو همکاریو په غښتلتیا او سولې ګډ کار وکړي.))
د روسیې نوي سفیر دمیتري الکساندروویچ ژیرنوف له جمهوررئیس څخه د باورلیک منلو له امله مننه وکړه او په افغانستان کې یې په خپل ماموریت خوښي وښوده.
هغه وویل، د خپل ماموریت پر مهال به له افغانستان سره د روسیې د مناسباتو د لا پياوړتیا او د اقتصادي همکاریو د پراختیا لپاره خپلو هڅو ته دوام ورکړي.