تاند، شنبه، د جوزا ۱۰مه: د فاریاب چارواکي وايي، طالبانو د ابګردان دهن درې بند کارونه په ټپه درولي دي.
د فاریاب والي وايي، طالبانو ادعاوې کولې چې له عام المنفعه پروژو سره کار نلري خو اوس له هیواده بهر د طالبانو مېشتو مشرانو امر کړی دی چې د ابګردان بند د پروژې کارونه ودروي.
د فاریاب والي نقیب الله فایق زیاتوي، طالبانو تر دې وړاندې هم په المار ولسوالۍ کې هم د یو بند د پروژې د کارونو مخه نیوله او له همدې کبله یې کارونه ځنډېدلي وو.
بلخواد فاریاب د ولایتي شورا غړی فضل الحق محمدي وايي، دوی په هڅه کې دي چې د ځايي خلکو په منځګړیتوب د ابګردان بند په ټپه درېدلي کارونه طالبانو سره له خبرو وروسته بیا پيل شي: (( دا بند د طالبانو په ساحه کې جوړېږي او هغوی په خپل ټول توان د دغه بند د کار مخه نیسي.))
نوموړی وایي، طالبان په دغه سیمه کې د بند کارونه نه پرېږدي خو له خلکو څخه په زور ډوډۍ خوري چې که دغې ولسي ځورونې ته د پای ټکی کېنږدي، نو خلک به یې پر ضد راپورته شي.
د دهن درې ابګردان بند کارونه د فاریاب په پښتونکوټ ولسوالۍ کې د ۱۳۹۶ کال په عقرب میاشت کې پيل شول خوتر اوسه بشپړ شوي نه دي.
چارواکي وايي، د ابګردان بند د افغانستان د اوبو له پنځو لویو بندونو څخه دی چې ۲۰ میلیونه متر مکعب اوبه په کې ذخیره کېدای شي او ۳۷ میلیونه ډالر لګښت پرې راځي.