تاند، پنجشنبه، د جوزا ۸مه: فاریاب کې ترافیکي پېښې ۱۰ تنه وژلي او ۵ نور یې ژوبل کړي دي.
د فاریاب د امنیه قومندانۍ ویاند کریم یورش تاند ته په استولې خبرپاڼه کې ویلي، پېښه د دولت اباد ولسوالۍپه په قرم قول سیمه کې د دوه موټرو د ټکر له امله رامنځته شوې ده .
نوموړی وايي، په پېښه کې ۱۰ کسان وژل شوي او ۵ ژوبل کسان د اندخوی روغتون ته لېږدول شوي چې وضعیت يې ښه نه دی: (( د پېښې قربانیان او ژوبل کسان ښځې، ماشومان او د ډېر عمر لرونکي دي او کیدای شي د مړو شمېر یې زیات شي.))
نوموړی وايي، د پېښې علت د موټرو سرعت او د موټروانانو بې احتیاطي وه.
ترافیکي پېښې په افغانستان کې د ځانمرګو او ترهګریزو بریدونو ترڅنګ زیات ملکي تلفات اړوي.
ګڼې دا پېښې د بې احتیاطۍ، د سړکونو د خرابوالي او ترافیکي قوانینو د نه مراعات له کبله رامنځته کېږي.