تاند، پنجشنبه، د جوزا ۸مه: د کندهار د کورونا تشخیصیه لابراتوار له نږدې دوه اوونیو راهیسې د موادو د نه ور رسېدو له امله تړلی دی.
د کندهار د عامې روغتیا ریاست وايي، ۱۱ ورځې کېږي چې په لابراتوار کې یې مواد خلاص شوي، لابراتوار تخنیکي ستونزه پیدا کړې او د لابراتوار کارمندان په کورونا اخته شوي چې له کبله یې د دوی کارونه په ټپه درېدلي دي.
د کندهار د عامې روغتیا رئیس طاوس نادري خبرداری ورکړی چې دا مهال د دغه ولایت ۷۰ سلنه اوسېدونکي د کورونا له ګواښ سره لاس و ګرېوان دي او که د لابراتورا غم ونه خوړل شي فاجعه به رامنځته شي.
بلخوا د کندهار والي حیات الله حیات هم تاند ته تایید کړه چې لابراتوار تخنیکي ستونزه لري او د ده ټېسټ هم له یوې اوونۍ راهیسې ځنډېدلی دی: (( که مرکز په دې ستونزه سر نه خوږوي نو واقعن دا ستره بې توجهي او بې غوري ده.))
خو د عامې روغتیا وزارت وايي، د کندهار تشخیصه لابراتوار چاپېریال په کورونا ککړ شوی دی او څو ورځو کې به یې پلاوی د دغه ولایت کتو ته ورشي.
د وزارت ویاند وحید مایار تاند ته وايي، د کندهار د لابراتوار ستونزې ځنډېدو علت دا و چې پروازونه ځنډول شوي وو، خو اوس په راتلونکو دوه ورځو کې امکان شته چې پلاوی کندهار ته ورسېږي.
کندهار چې له یوولسو ورځو راهیسې یې د کورونا د پېښو راپور نشته، په کې دوه اوونۍ وړاندې ۶۳۶ مثبتې پېښې ثبت شوې وې.