تاند (پنجشنبه، د تلې/ میزان ۲مه) د پاکستان او افغانستان ترمنځ کړکېچ د پنجشنبې په ورځ لا پسې زیات شوی دی. د پاکستان د امنیتي سرچینو په وینا، د بلوچستان د ګلستان په سیمه کې یې د پولې له هاخوا د افغان طالبانو د وسلهوالو د ننوتلو هڅه شنډه کړې او د چټک غبرګون په ترڅ کې یې د طالبانو یو شمېر وسلهوال وژلي دي.
د راپورونو له مخې، د پنجشنبې په ورځ ناوخته افغان امنیتي ځواکونو هڅه کړې چې د پاکستان خاورې ته واوړي. پاکستاني ځواکونو سمدستي غبرګون ښودلی او په سیمه کې پر له پسې ډزې هم روانې وې.
د پولې په دې حساسې سیمه کې امنیتي ځواکونه د نورو نفوذي بریدونو د مخنیوي لپاره په لوړ چمتووالي کې ساتل شوي دي.
په افغانستان کې ددفاع وزارت یا د طالبانو نورو سرچینو تراوسه پورې په دې اړه څه نه دي ویلي.
خو له کندهاره ترلاسه شوي راپورونه وايي چې د سپین بولدک ولسوالۍ په کاروان ګو سیمه کې د شپږمې لوا د درېیم کنډک ځواکونو پر پاکستانيو ځواکونو ځوابي برید کړی او ترمنځ یې دوه ساعته جګړه شوې ده.
له بلې خوا پاکستاني رسنۍ وايي، دا تازه نښته په داسې مهال شوې چې د پولې په اوږدو کې د وسلهوالو د تګ راتګ، د بېپیلوټه الوتکو د ننوتلو، توپچي ډزو او په افغانستان کې د پاکستان د هوايي بریدونو لړۍ په چټکۍ سره پراخېږي.
د یورند کرښې په اوږدو کې نښتې
پاکستاني ځواکونو ویلي چې تر دې مخکې یې د پکتیا او ننګرهار ولایتونو ته څېرمه، له افغان پوستو څخه د وسلهوالو د نفوذ هڅه هم شنډه کړې وه.
د پاکستان د ادعا له مخې، له دې وروسته افغان ځواکونو د هاوانونو او درنو وسلو ډزې پیل کړې، چې په ځواب کې یې پاکستاني ځواکونو توپچي ډزې کړې دي.
د کرښې په څو برخو کې د دواړو لورو ترمنځ د ډزو له دوام سره، امنیتي ځواکونه لا هم په لوړ چمتووالي کې دي او د نورو احتمالي نښتو د مخنیوي لپاره څارنه کوي.