تاند (چهارشنبه، د وږي/ سنبلې ۲۵ مه) ټاکل شوې ده چې د ملګرو ملتونو امنیت شورا نن، چهارشنبه، د سپټمبر په ۱۶مه، د افغانستان د وضعیت د ارزونې په اړه غونډه وکړي.
په دې غونډه کې به، چې د کابل په وخت د ماښآم په شپږ نیمې بجې پیلېږي، د افغانستان لپاره د ملګروملتو د مرستندوی پلاوي (یوناما) سرپرسته جورجیت ګانیون د افغانستان د وروستیو انکشافاتو په اړه د امنیت شورا غړو ته معلومات وړاندې کړي.
د ملګرو ملتونو امنیت شورا ویلي، چې د افغانستان په اړه له علني غونډې مخکې به د شورا غړي د تړلو دروازو تر شا هم د دې هېواد پر وضعیت خبرې وکړي.
د امنیت شورا د معلوماتو له مخې، د بشري حقونو او د ښځو د حقونو وضعیت د غونډې له مهمو بحثونو څخه دی. د افغانستان په تړاو په نړیواله ټولنه کې یوه تر ټولو جدي او د بحث وړ موضوع د نجونو د زده کړو او د ښځو خلاف د بندیزونو ده چې په تېرو ۵ کلونو کې طالبانو لګولي دي.