تاند/ چهارشنبه د وږي ـ سنبلې ۲۳مه/ رویټرز خبري اژانس د امریکا د کانګرس د مالي څارونکې ادارې د معلوماتو په اساس راپور ورکړی، چې د ایران پر وړاندې د امریکا د شپږ میاشتني جګړې لګښت تر اوسه ۳۸ میلیارد ډالرو ته رسېدلی.
په راپور کې اټکل شوی چې، دغه اندازه به هره میاشت شاوخوا ۳ میلیارد ډالر نوره هم زیاته شي.
رویټرز په خپل راپور کې ویلي، تمه کېږي دغه جګړه به د ۲۰۲۷ کال په لومړیو درېیو میاشتو کې د انفلاسیون کچه ۰.۵ سلنه لوړه کړي.
په دې محاسبه کې ټول هغه لګښتونه شامل دي چې، د اګست تر لومړۍ نېټې پورې ثبت شوي دي.
راپور زیاتوي، چې د جګړې د لګښتونو زیاتوالي د امریکا د مهماتو پر زېرمو فشار راوستی او د انرژۍ بیې یې هم لوړې کړې دي.
سرچینه وایي چې، دغه وضعیت د امریکا د نورو احتمالي شخړو پر وړاندې د غبرګون د وړتیا په اړه اندېښنې زیاتې کړې دي.
خو سپینې ماڼۍ او پنټاګون د مهماتو د کمښت راپورونه رد کړي او ویلي یې دي، چې د امریکا پوځ په کافي اندازه مهمات لري.