تاند (چهارشنبه، د وږي/ سنبلې ۱۸ مه) د طالبانو حکومت یو ځل بیا د پاکستان هغه ادعا رد کړې چې ګواکي د جیش محمد بنسټګر مسعود اظهر له افغانستان څخه فعالیت کوي. د افغانستان د بهرنیو چارو وزارت یوه لوړپوړي چارواکي هم تایید کړې چې مسعود اظهر په افغانستان کې نه شته.
کابل یو ځل بیا ټینګار کړی چې د افغانستان خاوره به د بل هېڅ هېواد پر ضد د اقداماتو لپاره ونه کارول شي.
د هندي رسنیو د راپور له مخې، د مسعود اظهر موضوع په داسې حال کې بیا راپورته شوې چې پاکستان د ترهګرو ډلو او د هغوی د مشرانو پر وړاندې د خپلو اقداماتو له امله تر نړیوالې څارنې لاندې دی. مسعود اظهر په هند کې د څو لویو ترهګریزو بریدونو په تړاو د هند له لوري مطلوب دی، چې په ۲۰۰۱ کال کې د هند پر پارلمان برید، د ۲۰۰۸ کال د ممبۍ بریدونه، د ۲۰۱۶ کال د پټانکوټ هوايي اډې برید او د ۲۰۱۹ کال د پلوامه چاودنه هم پکې شامل دي.
پاکستان څه وايي؟
اسلاماباد له اوږدې مودې راهیسې ادعا کوي چې مسعود اظهر افغانستان ته تښتېدلی دی. دا موضوع په ځانګړي ډول هغه مهال د پاکستان لپاره مهمه شوه چې دغه هېواد د مالي اقداماتو د کاري ډلې (FATF) له فشار سره مخ و او ترې غوښتل کېدل چې د ترهګرۍ د تمویل پر وړاندې جدي اقدامات وکړي.
د راپور له مخې، FATF به په خپله راتلونکې عمومي غونډه کې د پاکستان د ترهګرۍ ضد اقدامات بیا وارزوي. پاکستان له ۲۰۱۸ تر ۲۰۲۲ کال پورې د FATF په خړ نوملړ کې و، چې لامل یې د پیسو سپینولو پر وړاندې په نظام کې نیمګړتیاوې او د ترهګرۍ د تمویل د مخنیوي په برخه کې کمزوري اقدامات بلل شوي وو.
د راپور له مخې، په خړ نوملړ کې د پاکستان د شاملېدو له مهمو لاملونو څخه د جیش محمد او لشکر طیبه له شبکو سره د تړلي ترهګرۍ د تمویل په مخنیوي کې پاتې راتلل او د ملګرو ملتونو له خوا د نومول شویو کسانو پر وړاندې د مالي بندیزونو کمزوری عملي کول وو.
پاکستان له خړ نوملړ څخه د وتلو لپاره اړ و چې د جیش محمد او لشکر طیبه او د هغوی اړوند مخپټو سازمانونو پر فعالیتونو بندیز ولګوي او د دغو ډلو د مشرانو پر وړاندې قانوني محکومیتونه یقیني کړي.
د مسعود اظهر پر وړاندې د پاکستان ژمنې
مسعود اظهر د ۲۰۱۹ کال په مې میاشت کې د ملګرو ملتونو امنیت شورا له خوا نړیوال ترهګر اعلان شوی و. د «انډیا ټوډې» د راپور له مخې، هغه په ۲۰۲۱ کال کې د پاکستان له خوا په غیابي ډول هم محکوم شوی دی.
پاکستان په ۲۰۲۲ کال کې د FATF له خړ نوملړ څخه وایستل شو، خو په دې شرط چې د پیسو سپینولو پر وړاندې د اسیا ـ پاسفیک ډلې له خوا به یې د ځینو ځانګړو برخو فعالیتونه څارل کېږي.
د راپور له مخې، د FATF په غوښتنه د پاکستان د ارزونې له برخو څخه یوه دا وه چې دغه هېواد به د مسعود اظهر د نیولو لپاره خپلو هڅو ته دوام ورکوي.
خو د دې بهیر څارونکي وايي، پاکستان له خړ نوملړ څخه له وتلو او د نړیوال فشار له کمېدو وروسته له FATF سره له ځینو کړو ژمنو شا ته شوی دی. د دوی په وینا، پاکستان د مسعود اظهر د نیولو لپاره عملي اقدام نه دی کړی او دلیل یې دا ښودلی چې هغه په پاکستان کې نه دی.
اسلاماباد ادعا کړې چې مسعود اظهر د ۲۰۱۹ کال په مې میاشت کې له ډیورنډ کرښې افغانستان ته اوښتی او له هغه وخت راهیسې ورک دی.
طالبانو پخوا هم د مسعود اظهر شتون رد کړی و
د طالبانو حکومت ویاند د ۲۰۲۲ کال په سپټمبر کې په افغانستان کې د مسعود اظهر د موجودیت ادعا رد کړې وه.
طالبانو ویلي وو چې مسعود اظهر په افغانستان کې نه شته او پاکستان هم د هغه د شتون په اړه له افغان حکومت سره کوم رسمي تماس نه دی نیولی.
په دې توګه، د طالبانو حکومت یو ځل بیا د پاکستان ادعا رد کړې چې مسعود اظهر په افغانستان کې دی؛ په داسې حال کې چې پاکستان لا هم د ترهګرۍ د تمویل پر وړاندې د خپلو اقداماتو او له نړیوالو ادارو سره د خپلو ژمنو د عملي کولو له امله تر څارنې لاندې دی.