تاند (سې شنبه، د وږي/ سنبلې ۳ مه) د پاکستان د تحریک انصاف ګوند د بنسټګر عمران خان پخوانۍ مېرمن جمایما خان د بریتانیا له حکومت څخه وغوښتل چې د عمران خان د بندي کېدو او د هغه پر وړاندې د ادعا شویو بشري حقونو د سرغړونو په اړه غږ پورته کړي او خپله چوپتیا پای ته ورسوي.
اغلې جایما خان، چې په خپله هم بریتانیايي ده، کلونه وړاندې له عمران خان سره شریک ژوند پای ته رسولی خو له دې سره سره د عمران خان په وړاندې د هغه څه په خاطر، چې دا یې زیاتی او د بشري حقونو سرغړونه بولي، د خپل هیواد د حکومت د غبرګون غوښتنه کوٍي.
جمایما خان په ټولنیزو رسنیو کې په یوه پیغام کې ویلي چې عمران خان له شاوخوا درې کلونو راهیسې له سیاسي غچ اخیستنې سره مخامخ دی او له اوږدې مودې راهیسې په انفرادي بند کې ساتل کېږي.
هغې ادعا کړې چې په دې اړه د پاکستان د سترې محکمې حکم هم نه عملي کېږي.
جمایما خان د بریتانیا له حکومت څخه غوښتنه کړې چې د عمران خان د لومړنیو بشري حقونو د خوندیتوب لپاره په ښکاره او روښانه ډول غږ پورته کړي.