تاند/ شنبه د اسد-زمري ۳۱مه/ د افغانستان کرکټ بورډ ویلي، چې د دغې ادارې د کورني کرکټ څانګې له کلني پلان سره سم احمد شاه ابدالي فرسټ کلاس نهم پړاو سیالۍ د روانې اګست میاشتې په ۲۹مه نېټه پيلېږي.
دغه سیالۍ به د راتلونکې اکټوبر میاشتې تر ۸مې پورې په خوست او ننګرهار ولایتونو کې دوام ومومي.
کرکټ بورد ویلي چې، په یادو سیالیو کې څلور بېلابېلې لوبډلې ګډون لري:
۱ـ ماهیپر ستوري
۲ـ میوند اتلان
۳ـ پامیر لیجېنډز
۴ـ هندوکش سټرایکرز
په لومړۍ لوبه کې به یې دفاعي اتله میوند اتلان لوبډله د اګست میاشتې په ۲۹مه د ماهیپر ستوري لوبډلې پر وړاندې د سیالۍ ډګر ته ښکته شي.
د دغو سیالیو د مهالوېش له مخې به ټولې ګډون کوونکې لوبډلې له یو بل سره دوه ځلې مخامخ شي، هره لوبډله به ۶ لوبې ترسره کړي چې له منځه به یې دوه مخکښې لوبډلې د اکټوبر په ۴مه پیلېدونکې پایلوبې ته لاره ومومي.
کرکټ بورد وایي، په نهم پړاو احمد شاه ابدالي فرسټ کلاس سیالیو کې به د ملي لوبډلې د یو شمېر لوبغاړو ترڅنګ د کورني کرکټ ګڼ شمېر نوموتي او د غوره کارکردګۍ لرونکي لوبغاړي ولوبېږي.
بورډ زیاته کړې چې په دغو سیالیو په لومړیو دوه لوبو کې به د افغان ابدالیان لوبډلې لوبغاړي هم ولوبېږي چې له هغه وروسته به یاد لوبغاړي د ۲۰۲۶م کال اسیايي سیالیو کې د ګدون په موخه جاپان ته سفر وکړي او پرځای به یې د کورني کرکټ یو شمېر نور ځوان لوبغاړي ولوبېږي.
احمد شاه ابدالي فرسټ کلاس سیالۍ د افغانستان کرکټ بورډ د کورني کرکټ په جوړښت کې له خورا ستر ارزښته برخمنې دي چې په هېواد کې د لوبغاړو او لوبې د اوږدې بڼې د ودې په برخه کې ستر رول لوبوي.