تاند/ شنبه د اسد-زمري ۳۱مه/ د هېواد پخواني ولسمشر حامد کرزي د امریکا استازو جرګې ته د افغانالاصله امریکایۍ عایشه وهاب د بریا مبارکي ویلې او هغې ته یې د لا نورو بریاو هیله کړې ده.
حامد کرزي ویلي چې د عایشه وهاب بریا د ټولنې په بېلابېلو برخو کې د حضور لپاره د افغان ښځو وړتیا ښیي.
د هغه په خبره که ښځو ته په هېواد دننه او یا بهر ورته زمینه برابره شي، نو کولای شي د ټولنې او هېواد په پرمختګ کې رغنده رول ولوبوي.
عایشه وهاب د پنجشنبې په ورځ د امریکا د متحدوایالتونو د کلیفورنیا د استازو جرګې د ۱۴مې حوزې د څوکۍ لپاره ځانګړې ټاکنې وګټلې.
دا هغه څوکۍ ده چې پخوا اېرېک سوالوېل ګټله.
د وهاب بری تاریخي بلل شوی، ځکه هغه لومړنۍ افغان الاصله امریکایۍ شوه چې د امریکا کانګرس ته د انتخاباتو له لارې لار مومي.
دا بری د اغلې وهاب په سیاسي ژوند کې نوی پړاو بلل کېږي. نوموړې خپله سیاسي دنده په سیمهییز حکومت کې پیل کړه، وروسته د کلیفورنیا ایالتي سنا جرګې ته ولاړه او اوس یې د فدرالي سیاست ډګر ته لار موندلې ده.
وهاب وروسته له هغې د سوالوېل خالي شوې څوکۍ وګټله چې نوموړي د ناوړه جنسي چلند له تورونو وروسته په تېر اپرېل کې له خپلې څوکۍ استعفا وکړه.
د دې څوکۍ د خالي کېدو له امله پر دې څوکۍ داسي سیالي پیل شوه چې په رسنیو کې یې پراخ انعکاس وموند، سیالي د دیموکرات ګوند د دوو نوماندانو، عایشه وهاب او میلیسا هرنانډېز ترمنځ وه.
انتخاباتي سیالي له پراخو سیاسي لګښتونو او پر سیمهییزو او ملي موضوعاتو له تودو بحثونو سره مله وه.
د عایشه وهاب تاریخي بری؛ لومړۍ افغانالاصله امریکایۍ چې د امریکا کانګرس ته انتخاب شوه