تاند (سېشنبه، د زمري/ اسد ۲۷ مه) اروپايي ټولنې د کابل په لوېدیځ کې په «شمع هدایت» خصوصي ښوونځي کې پر چاودنې ژوره اندېښنه څرګنده کړې او ویلي یې دي چې د راپورونو له مخې په پېښه کې لسګونه زدهکوونکي ټپیان شوي دي.
اروپايي ټولنې ټینګار کړی چې ښوونځي باید د ماشومانو لپاره خوندي ځایونه وي او پر زدهکوونکو او ښوونیزو مرکزونو قصدي بریدونه «د منلو نه دي».
چاودنه د دوشنبې په مازدګیر د زده کوونکو د رخصتېدو په مهال وشوه. ځايي سرچینو ویلي چې شاوخوا ۵۰ زدهکوونکي په چاودنه کې ټپیان شوي، خو د مرګژوبلې وروستۍ شمېره لا په خپلواک ډول نه ده تایید شوې.
تر اوسه هېڅ ډلې د دې چاودنې مسوولیت نه دی منلی. د طالبانو د حکومت ویاند ذبیحالله مجاهد ویلي، ښايي چاودنه داعش یا د دې ډلې اړوندو کسانو کړې وي. نوموړي زیاته کړې چې د پېښې په اړه څېړنې روانې دي او امنیتي ځواکونه د برید د عاملانو د پېژندلو او نیولو هڅه کوي.
په افغانستان کې د بشري حقونو لپاره د ملګرو ملتونو ځانګړي راپور ورکوونکي ریچارډ بېنټ دا چاودنه «ډېره خواشینوونکې» بللې او د بشپړې او خپلواکې څېړنې غوښتنه یې کړې ده.