تاند (شنبه د اسد/زمري ۱۰مه) پر بشري حقونو د څار بنسټ (HRF) د پاکستان تر ولکې لاندې کشمیر کې د لاریونوالو پر وژل کېدو اندېښنه ښودلې.
یادې ادارې له پاکستاني حکومت غوښتي چې د لاریونوالو له ځپلو لاس واخلي.
د دې بنسټ په راپور کې ویل شوي چې له تېرو دریو ورځو راهیسې د پاکستان تر ولکې لاندې کشمیر کې ۳۰ سولهییز لاریونوال په ډزو وژل شوي دي.
د HRF په راپور کې راغلي چې پاکستاني حکومت دې د اعتراضونو پر وړاندې زورزیاتی پای ته ورسوي، د ګرځنده مخابراتو بند شوي خدمتونه دې بېرته فعال او د زور د هر ډول ناقانونه کارونې په تړاو شفافه او قانوني حساب ورکونه یقیني کړي.
دغه بنسټ همداراز ټینګار کړی چې د سولهییزو اعتراضونو د ځپلو لپاره د امنیتي ځواکونو له تاوتریخوالي ډکې لارې د منلو نه دي او د هغو کسانو پر وړاندې باید قانوني چلند وشي چې د دغو پېښو مسوولیت لري.
په وروستیو کې د پاکستاني پوځ له لوري د پاکستان تر ولکې لاندې کشمیر کې د سولهییزو لاریونوالو وژل پیل شوي.
د رسنیو د راپورونو له مخې تر دې دمه لسګونه لاریونوال وژل شوي او لسګونه نور نیول شوي دي.