تاند ( پنجشنبه د زمري ـ اسد ۸مه) د افغانستان د کرکټ ملي لوبډلې لوبغاړو یو ځل بیا په نړیواله کچه د پام وړ مقامونه خپل کړي دي.
د کرکټ د نړیوالې شورا (ICC) په تازه خپره شوې درجه بندۍ کې افغان لوبغاړو په بېلابېلو برخو کې خپل لوړ ځایونه ساتلي او د افغانستان د کرکټ نوم یې یو ځل بیا د نړۍ په کچه مطرح کړی دی.
د افغانستان د شل اووریزو او یو ورځنیو لوبو مخکښ توپاچوونکی راشدخان د دواړو فارمټونو د بالرانو په درجه بندۍ کې د نړۍ لومړی مقام خپل کړی دی.
کرکټ پوهان وایي، د هغه دوامداره غوره فعالیت، تجربه او د مهمو سیالیو پر مهال اغېزناک توپاچونه هغه لا هم د نړۍ له مخکښو بالرانو څخه ګرځوي.
بلخوا، عظمت الله عمرزي هم د الرونډرانو په نړیواله درجه بندۍ کې لومړی مقام خپل کړی دی.
کرکټ پوهان په دې باور دي چې دا لاستهراوړنه د افغانستان لپاره ځکه مهمه ده چې عمرزي په وروستیو سیالیو کې د توپوهنې او توپاچونې دواړو برخو کې د پام وړ وړتیا ښودلې ده.
دغه راز د افغانستان تجربهکار الراونډر محمد نبي هم د الرونډرانو په نړیواله درجهبندۍ کې درېیم مقام خپل کړی دی.
په ورته مهال، د افغانستان ځوان او تکړه توپوهونکی ابراهیم ځدراڼ د یو ورځنیو لوبو د توپوهونکو په نړیواله درجه بندۍ کې پنځم مقام ته رسېدلی دی.
د نظر خاوندان وایي، د هغه دا مقام ښيي چې افغانستان یوازې په توپاچونه کې نه، بلکې د توپوهنې په برخه کې هم د نړۍ له پیاوړو لوبډلو سره د سیالۍ وړ لوبغاړي لري.
د کرکټ د برخې افغان شنونکي وایي، د افغان لوبغاړو دا نړیوال مقامونه یوازې د څو لوبغاړو شخصي بریا نه ده، بلکې د افغانستان د کرکټ د ودې او نړیوال اعتبار څرګندونه هم کوي.
دوی وایي راشدخان، عظمت الله عمرزي، محمد نبي او ابراهیم ځدراڼ هر یو په خپله برخه کې د افغانستان د کرکټ استازیتوب کوي او د نړۍ په تر ټولو معتبره درجه بندۍ کې د هغوی حضور د افغان مینهوالو لپاره د ویاړ خبره ده.