تاند (دوشنبه، د زمري/ اسد ۵ مه) د طالبانو حکونت ته نژدې حریت راډیو ادعا کړې چې د افغانستان د دفاع وزارت بې پېلوټه الوتکو نن (دوشنبې) د خیبرپښتونخوا ایالت د چترال په سیمه کې د داعش او د نورو وسله والو مخالفانو پر مرکزونو هوايي برید کړی دی.
دا بریدونه وروسته له هغه کېږي چې د ازادۍ جبهې په نوم د طالبانو د حکومت یوې وسله والې مخالفې ډلې د کوز چترال له شاه سلیم څخه ډیورند کرښې ته نژدې په زیباک ولسوالي کې بریدونه وکړل او د طالبانو په وینا حمله کوونکي یا ووژل شول او یا بېرته چترال ته وتښتېدل.
د حریت راډیو د ادعا له مخې، د چترال په شاه سلیم کې بمباري شوي مرکزونه د طالبانو پر ضد د بریدونو د پلان جوړونې لپاره کارېدل.
پاکستان یا د طالبانو دفاع وزارت تراوسه پورې په دې اړه څه نه دي ویلي.
تر دې وړاندې د افغانستان په دفاع وزارت پورې اړوندو بې پېلوټه الوتکو څو ځلې د اسلام اباد – راولپنډۍ په شمول په پاکستان کې هدفونه ویشتي. وروستی ځل طالبانو ویلي و چې په خیبر دره کې یې د داعش مرکزونه ویشتي دي. پاکستان دا برید تایید کړی و خو ادعا یې کړې وه چې د طالبانو بې پېلوټه الوتکې یې مخکې تر دې چې هدف په نښه کړي، ویشتي دي.