تاند (چهارشنبه، د وږي/ سنبلې ۱۸ مه) مصنوعي ځیرکتیا په چټکۍ سره د کرنې بڼه بدلوي. بزګران اوس کولی شي د خپلو ځمکو حالت، د حاصلاتو اندازه، د اوبو اړتیا او د څارویو روغتیا په لا دقیقه توګه وڅاري.
۱- د کروندو څارنه:
ډرونونه او سپوږمکۍ د ځمکو عکسونه اخلي او مصنوعي ځیرکتیا یې شننه کوي. په دې توګه د بوټو ناروغۍ، افتونه او د فصل ستونزې د انسان سترګې ډېر ژر پېژني.
۲- د حاصلاتو اټکل:
مصنوعي ځیرکتیا د هوا او پخوانیو معلوماتو له مخې اټکل کوي چې څومره حاصل به راټول شي. دا له بزګرانو سره مرسته کوي چې د محصول د لېږد او پلور لپاره مخکې له مخکې چمتووالی ونیسي.
۳- روباټونه:
ځینې کرنیز روباټونه کولی شي په خپله تراکتور وچلوي او له فصلونو څخه واښه او نور زیان رسوونکي بوټي وپېژني او له منځه یې یوسي.
۴- د اوبو سپما:
د اوبولګونې هوښیارې الې/ ماشینونه د خاورې لندبل، د هوا تودوخه او د باران اټکل څاري او یوازې هغه وخت اوبه کاروي چې اړتیا ورته وي. په ځینو ځایونو کې دې کار د اوبو مصرف شاوخوا ۳۰ سلنه کم کړی دی.
۵- د څارویو څارنه:
مصنوعي ځیرکتیا د کمرې او ځانګړو سینسورونو له لارې د څارویو د ناروغۍ نښې له ښکاره کېدو څو ورځې مخکې پېژندلی شي. دا کار د درملو، په ځانګړي ډول انټيبیوټیکونو، د بېځایه استعمال مخه نیسي.
په ټوله کې، مصنوعي ځیرکتیا له بزګرانو سره مرسته کوي چې لږې اوبه او درمل وکاروي، ناروغۍ ژر ومومي او حاصلات په ښه ډول مدیریت کړي.